Ich var mit iuwern hulden, herren unde mâge:
luit unde lant diu müezen sælic sîn.
Es ist unnôt daz iemen mîner verte vrâge:
ich sage wol für wâr die reise mîn.
Mich vienc diu Minne und lie mich varn ûf mîne sicherheit,
nû hat sî mir enboten bî ir liebe daz ich var.
Ez ist unwendic; ich muoz endelîchen dar:
wie kûme ich bræche mîne triuwe und mînen eit!
Sich rüemet maneger waz er dur die Minne tæte:
wâ sint diu werc? Die rede hoere ich wol,
doch sæhe ich gerne dazs ir eteslîchen bæte
daz er ir diente als ich ir dienen sol.
Ez ist geminnet, der sich dur die Minne ellenden muoz:
nû seht wies mich ûz mîner zungen ziuhet über mer.
Und lebte mîn her, Salatîn und al sîn her,
dienbræhten mich von Vranken niemer einen fuoz.
Ir minnesinger, ir muoz ofte misselingen:
daz iu den schaden tuot daz ist der wân.
Ich wil mich rüemen, ich mac wol von minne singen,
sît mich diu Minne hât und ich sî hân.
Daz ich dâ wil, seht daz wil alse gerne haben mich:
sô müezt ab ir verliesen under wîlen wânes vil:
ir ringet umbe liep daz iuwer niht enwil:
wan müget ir armen minnen solhe minne als ich?